كل سنة و كل الشعوب فى سلام و سكينة و رضا من الرحمن الرحيم , و يا رب شعبنا و الشعوب اللى حوالينا ينعموا بالإنتصار على الطغيان و الظلم .
هحكى حكاية صغيرة عن اللى حصل معايا العيد الكبير السنة دى و يا ريت تستحملونى الكام سطر دول ..
كعادتى بروح مع أسرتى علشان نحضر "دبح" العجل اللى اشتركنا فيه مع أقربائنا , و طبعاً ببقى عاصر على نفسى ليمونة عشان أستحمل اليوم دة بدمه و كرشته و تباتة الجزار و المتسولين اللى "بيلزقوا" على الواحد لحد ما يرميلهم عضمة و لا سمينة . بس كان فيه حاجة جديدة السنة دى , لقيت و احد اسيوى عرفت بعد كده انه من كوريا الجنوبية كان بيصور (فيديو و فوتوغرافيا) مشاهد ذبح و سلخ و تقطيع العجول عند الجزار اللى كنا بندبح عنده .
سألت نفسى : يا ترى هو كان بيصور الحاجات دى ليه ؟ (مع العلم ان فيه ناس كيفها تصور الحاجات دى) , هل علشان ينشرها بعد كده على انها مظهر ثقافى أو دينى , أو انه متعصب للحيوانات و عايز يفرج الناس مدى احتقار الإسلام لحيوانات الأضاحى , و لا عايز يطلعنا شعب قذر عشان بندبح على الشارع و مبنظفش مكان ما دبحنا ؟؟ . و للأسف نفسى ما طعوتنيش انى أروحلو و أسأله .
السؤال الأكبر اللى شغل دماغى بقيت اليوم : هو احنا بنعمل ده كله ليه ؟! , هل بنتبع السنة النبوية و لا بنجيب لحمة طازة بسعر أرخص ؟ . و للأسف إن معنديش وقت كافى إنى أعمل بحث فى النصوص النبوية اللى تخص المسألة دى , لكن من اللى قريته و مقتنع جدا بيه ان الإسلام كفمهوم يشمل أى عقيدة جاء داحضا أى مظهر من مظاهر الوثنية و منها تعظيم الحيوان و تقديم البشر كقربان كما كان يحدث مثلا فى الديانات المصرية القديمة , و قصة النبى اسماعيل هى خير تبسيط لمفهوم دحض التقرب الى الله بسفك دماء الإنسان و استبدلها بسفك دم حيوانات بعينها (حيوانات الأضاحى) .
بس مش بالطريقة اللى بنشوفها دى أبداً !!
السنة النبوية بتقول اننا نحسن الذبحة , السكين ما يفوتش أكتر من مرة على رقبة الأضحية , الأضحية تذبح على حدة علشان لا تثير رعب باقى الأضاحى , محور السنة كله حوالين نظافة المرء و طهارته فما بالنا بالضرر اللى عملنا لما خلينا من شوارعنا مزرعة بكتيريا و ميكروبات .
فى اعتقادى ان احنا بممارستنا دى بنخالف السنة النبوية أكتر ما بنحاول اننا نتبعها . فيها ايه لو يبقى فى أماكن مخصصة للذبح و التوزيع ؟ فيها ايه لو دفعنا نصيب الأضحية فلوس و اللحمة توصل لمستحقيها على مسئولية الجمعيات الخيرية ؟ فيها أيه لو ما دبحناش فى سنة من السنين خالص عشان نزود المخزون الحيوانى و نقلل معاناة الفقراء على مدار السنة مش بس فى يوم و لا يومين ؟
بعتذر للى حيقرا المدونة دى اذا حسسته انى ضد ممارسة شعيرة التضحية , لكن تأكد ان انا غيور على دينى و نفسى العالم كله يشير الى الإسلام بأنه دين عظيم من باب الإحترام و ليس من باب المجاملة .
بعتذر للى حيقرا المدونة دى اذا حسسته انى ضد ممارسة شعيرة التضحية , لكن تأكد ان انا غيور على دينى و نفسى العالم كله يشير الى الإسلام بأنه دين عظيم من باب الإحترام و ليس من باب المجاملة .
انشاء الله السنة اللى جاية ما يبقاش فى فقراء و لا محتاجين . و كل سنة و اتنو طيبين :)
