فرحنا أوى لما سمعنا خطاب "التخلى" و فرحنا أكتر لما شوفنا رموز النظام بتدخل السجن و فرحنا أكتر و أكتر لما شلنا الوزارة الهزلية الى اتشكلت اثناء الثورة و فرحنا أكتر و أكتر و أكتر لما الناس نزلت الأستفتاء على التعديلات الدستورية و فرحنا كتيير قوى لما رأس النظام بقى بيتحاسب زيه زى شركاؤه ..
بس كل ده مجرد بدايه , و التغيير الحقيقى مبدأش لسه ..
لسه مغيرناش فكرنا عن تقبل الاّخر, لسه مش قادرين نسمع بعض باهتمام , رجعنا للمصالح الشخصية تانى عشان تتحكم فى ضمائرنا .. أكيد مش بتكلم عن كل المصريين بس أكيد بتكلم عن قطاع كبير من المصريين و ده طبيعى لأن 59 سنة تربية على الأستبداد مش هتختفى فى يومين . بس فيه مرحلة جاية هى اللى حتحدد بشكل كبير شكل مستقبل مصر على الأقل فى الأربع سنين الجاية و هى مرحلة الأنتخابات النيابية و الرئاسية و الأستفتاء على دستور جديد , و أهمية المرحلة دى انها النتيجة الواقعية للثورة اما بتطبيق فعلى لأهداف الثورة أو بالعودة للنظم المستبدة السابقة و ده محتمل مع اغلبية سيطر عليها هم السكن و رغيف العيش .
الناس اللى نادت بالتغيير كانوا هما أول ناس بتغير حواليها قبل الثورة بكتير و أكيد كترو بعد الثورة بس المطلوب أن الفكر اللى يتغير عشان نقدر نغير. عايزين نغير فكرنا عن سبب وجودنا فى الدنيا , ليه بنتعلم ؟ , ليه بنشتغل ؟ , و نسأل نفسنا هل كل المطلوب مننا فى الدنيا اننا نتخرج و نشتغل و نتجوز و نجيب عيال و نكبرها و بس ؟ ولا احنا ممكن يبقى لينا دور أقوى من كده بكتير زى صنع ثورة تغيير فى مفهوم الحريات و حقوق الأنسان مثلا ؟؟ جايز يكون السؤال الثانى اجابته صعبة شويتين بس لما اخدناش حاجه زى دى فى اعتبارنا يبقى مش حنوصل اصلا لاجابة السؤال الأول ..
عشان كده حاول تخلى نفس جديد و حاول تبص لكل شئ بنظرة تغيير , حاول تبص للزبالة على انها كنز يمكن الاستفادة بشكل كبير منها , حاول تتخيل المدارس تشارك فى العمل التطوعى بدلا من الانهاك فى طابور عسكرى عبثى , بص للصحراء على انها محطة توليد كهرباء جبارة و مدينة المستقبل فى مصر , تخيل أن كل أجازة ليك ممكن تقضيها فى مكان مختلف فى مصر بدل ما تسافر بره ... كل ده وحاجات تانية كتير ممكن يبان على انه وهم كبير دلوقتى بس خيالك ده هو دليلك ازاى هتختار من يمثل مصر سياسيا فى المرحلة القادمة ..
أرجوك ابعد عن اللى بيخوفك من الأخطار الخارجية و أفتكر ايام الثورة اسرائيل كانت مرعوبة ازاى .. أبعد عن اللى بيوعدك برغيف عيش و شقة العلب , بقالنا كتير متشعلقين و الحرامية عمالين بيهزوها لينا .. ابعد عن اللى بيعلن عن نفسه بالشعارت و الصور .. و أكيد متبصش لأى واحد سنه فوق 65 أو من الحرس القديم ...دور على اللى يقوللك انزل دور على شغل و أنا حاساعدك و أحميك .. دور على اللى عايز يطور التعليم و يخلى مؤسساته و مناهجه مستقلة عن أهواء صناع القرار .. دور على اللى عمل حاجة فعلا للناس مش بس بيتكلم .. دور على عايز يوضع سياسة تمشيه مش هو هو اللى يمشى السياسة على مزاجه .. دور على اللى عايز يغير تسلسل صناعة القرار عشان يقضى نهائيا على المركزية ...
فكر دايما فى الجديد , و أكيد حتلاقى التغيير بيحصل !
No comments:
Post a Comment