خطبة الجمعة ما بعد الثورة

معرفش ليه مبقيتش مقبل على حضور خطبة الجمعة زى زمان , بس بقيت بحس أنها بقت زى الة الزمن بتروح فيها لزمان و بيئة مثالية و مختلفة تماما و بعد ما تخلص تصطدم بالواقع المؤلم اللى حواليك . ثقتى فى ائمة المساجد بقت أقل ما يكون و بالأخص بعد الإنتخابات البرلمانية , و الحمد لله البرلمان لا جاب مجد المسلمين و لا طبق الشريعة بما لا يخالف شرع الله .

أنا مقتنع تماما أن لولا تجمع المصريين ذو الأغلبية المسلمة فى صلاة الجمعة مكوناش حنقدر نبقى فى ربع اللى احنا فيه , الجماعة هى اللى بتخلى الحلم واقع و الموروث العقائدى و الثقافى اللى عندنا كتير بيحسدونا عليه . ليه ما نستغلش خطبة الجمعة فى توعية الناس على الأقل دينيا , على الأقل الناس تتعلم دينها صح و يا ريت لو الخطبة تناقش أحوال المنطقة المرتكز فيها المسجد أو الزاوية اللى فيها الخطبة و بعد الخطبة تبدأ الناس تتكلم مع بعضها و تشوف ازاى تحل مشاكلها ..

ايه , احوالنا كلها زى الفل يعنى , ما فيش عندنا مشكلة مجارى و لا واحد عندة مشكلة مادية أو شوارعنا كلها بتبرق عشان الخطبة ما تتكلمش عن أى حاجة غير عن حياة النبى عليه الصلاة و السلام أو الصحابة رضى الله عنهم و عنهن !

طب أيام النبى عليه الصلاة و السلام , كانت الخطبة بيتقال فيها ايه تفتكروا ؟!

الهروب إلى الماضى ليس الحل , نحن بحاجة إلى وصل القديم بالجديد , المسجد مؤسسة حيوية فى أى مجتمع مسلم سواء فى رعاية محيطه معنويا و ماديا أو فى التكامل مع باقى المؤسسات و منها الكنيسة فى حل مشاكل المجتمع اليومية بل وللضغط على صناع القرار للإهتمام بقضايا الشارع .